Бош саҳифа
Намоз ўқиш
Кичик суралар
Дуолар
Ҳадислар
Саловот
Истиғфор
601 - Ҳадис
601-ҳадис Абдуллоҳ ибн Умар ривоят қиладилар: “Набий (сав) ҳаётларида сўнгги бор хуфтон ўқидилар. Икки елкаларига салом берганларидан, сўнг, туриб: “Мана шу кўриб турган кечангиздан бошлаб юз йил ўтгач, Ер юзида ҳозир мавжуд бўлган кишилардан бирортаси қолмайди”, - дедилар. Одамлар Жаноб Расулуллоҳнинг сўзларини юз йил ичида ҳеч ким қолмас экан, деб нотўғри тушуниб, ваҳимага тушдилар. Аслида эса, Жаноб Расулуллоҳ бугун мана шу ерда ўтирган тенгқурлардан бирортаси ҳам қолмаслигини назарда тутган эдилар” (яна қ. 116).
602 - Ҳадис
42-боб Хуфтондан кейин бола-чақалари ва меҳмонлар билан сўзлашиб ўтириш ҳақида 602-ҳадис Абдураҳмон ибн Абу Бакр ривоят қиладилар: “Асҳоби суффа, яъни масжиднинг ҳовлисидаги супада яшайдиган уйсиз кишилар ниҳоятда камбағал эдилар. Набий (сав): “Кимнинг уйида икки кишига етгулик овқат бўлса, уч кишини, тўрт кишига етгулик овқат бўлса, беш-олти кишини олиб кетиб, тўйғазсин!” – дедилар. Абу Бакр уч кишини олиб келдилар. Жаноб Расулуллоҳ эса ўн кишини олиб кетдилар (Уларнинг ичида мен, отам, онам, билмайман яна хотиним, Абу Бакр билан пайғамбаримизнинг хонадонлари ўртасида югурдак ҳам бор эди шекилли). Абу Бакр пайғамбаримизнинг овқатланиб олишларини кутиб турдилар. Туннинг худо хоҳлаганча қисми ўтгандан кейин уйларига қайтдилар. Шунда хотинлари: “Меҳмонларни ташлаб қаерда юрибсиз?” – деди. Абу Бакр: “Уларни овқатлантирмадингми?” – дедилар. Хотинлари: “Сизни келасиз деб унамадилар, кетиб қолдилар”, - деди. Абу Бакр сўкиндиларда: “Ўзларинг еяверинглар, худо ҳаққи, мен сира емайман!” – дедилар. Аллоҳга қасамки, овқатни қанча есак ҳам, камайиш ўрнига кўпайиб борар эди. Биз тўйгунимизча едик, лекин овқат илгаригидан кўпайиб кетди. Абу Бакр буни кўриб, хотинларига: “Эй Бани Фироснинг синглиси, нега бундай бўлди?” – дедилар. Хотинлари: “Кўзларимга ишонгим келмайди, овқат илгаригидан уч баробар кўпайиб кетди”, - деди. Абу Бакр овқатдан едиларда: “Бу шайтоннинг ишидир”, - дедилар. Яъни, овқат емайман, деб ичган қасамларини назарда тутдилар. Кейин, яна бир луқма еб, қолганини Набий (сав)нинг ҳузурларига олиб кетдилар. Мен ўша ерда қолиб тонг оттирдим. Биз билан бир қавм ўртасида иттифоқ тузилган бўлиб, унинг вақти ўтган эди. Биз ўн икки киши бўлиб ажралиб чиқдик. Уларнинг ҳар бири қанча одам келганини билар эдим, барчалари биргаликда ўша овқатдан едилар” (яна қ. 3581, 6140, 6141).
603 - Ҳадис
БИСМИЛЛОҲИР РАҲМОНИР РАҲИМ Азон (айтиш) китоби 1-боб Азон айтишнинг бошланиши (тарихи) ва Аллоҳ таолонинг: “(Улар) намозга азон айтсангиз, уни (намозни ёки азонни) мазах ва ўйин қилиб оладилар. Бу уларнинг ақлсиз қавм эканидан (далолат)дир” (“Моида” сураси, 58-оят) ҳамда “Эй, имон келтирганлар! Қачонки жумъа кунидаги намозга (азон) чақирилса...” (“Жумъа” сураси, 9-оят) – деган каломи шарифи ҳақида 603-ҳадис Анас (рз.) ривоят қиладилар: “Расулуллоҳ (сав) одамларни намозга чақириш учун (аввал) ўт ёқмоқ, занг чалмоқ лозимлигини айтдилар, сўнг яхудий ва насороларнинг ибодатга шундай даъват қилганлари эсга тушиб, Билолга азон жумлаларини икки мартадан, такбир жумлаларини эса бир мартадан айтишни буюрдилар”.
604 - Ҳадис
604-ҳадис Ибн Умар айтар эдилар: “Мусулмонлар Мадинага келганларида бир ерга тўпланишиб, намоз вақтини белгилаб олишар эдилар. Намозга азон айтишмас эдилар. Бир куни намозга чақириш тўғрисида сўзлашиб қолдилар. Баъзилар: “Насоролар занг чалгани каби занг чалинглар!” – деса, баъзилар: “Яҳудийлар сурнай чалгани каби бир нарса чалайлик!” – дейишди. Шунда Ҳазрат Умар: “Намозга чақириш учун бир кишини юбормайсизларми?” – дедилар. Шунда Расулуллоҳ (сав) “Эй, Билол, ўрнингдан туриб, намозга чақиргин!” – деб айтдилар”.
605 - Ҳадис
2-боб Азон жумлалари икки марта - икки мартадан айтилади 605-ҳадис Анас (рз.): “Билолга азоннинг жумлаларини жуфт-жуфт қилиб, такбирни тоқ қилиб, “Қад қоматис-салот”ни эса икки марта айтиш буюрилди”, - дедилар.
606 - Ҳадис
606-ҳадис Анас (рз.): “Одамлар тўплангач, намоз вақти бўлганлигини бирор нарса билан маълум қилиш кераклиги ҳақида сўзлашдилар. Аввал, ўт ёқиш ёки занг чалиш керак, такбирни эса тоқ қилиб айтиш буюрилди”, - дейдилар.
607 - Ҳадис
607-ҳадис Анас (рз.): “Билолга азон сўзларини жуфт-жуфт қилиб, такбир сўзларини эса тоқ айтиш буюрилди”, - дейдилар. Исмоил: “Ушбуни Айюбга айтган эдим”, “Лекин, Қад қоматис-салот” жуфт айтилади” – деди”, - дейдилар.
608 - Ҳадис
4-боб Азон айтишни фазилати 608-ҳадис Абу Ҳурайра (рз.) қуйидаги ҳадисни айтиб бердилар: “Расулуллоҳ (сав): “Намозга азон айтилган кезда шайтон орқасидан ел чиқариб, то азон эшитилмайдиган ергача қочади. Азон айтиб бўлингач, тағин қайтиб келади. Такбир айтилиши билан яна орқасига қочади. Муаззин такбир айтишни тугатгач, намозхонларнинг дилига ғулғула солиш учун тағин қайтиб келади. Шайтон: “Фалон нарсани эслагин”, - деб намозхоннинг намоздан олдин эсига келмаган нарсаларни эслатади, ҳатто намозхон неча ракъат ўқиганини ҳам билмай қолади”, - деганлар”.
609 - Ҳадис
5-боб Баланд овоз билан азон айтмоқ Умар Абдулазиз: “Азонни аниқ, баланд овоз билан, оҳангга солмасдан айтгин, агар шундай қилмасанг, бизга муаззинлик қилишга ярамайсан!” – деганлар. 609-ҳадис Абдураҳмон ибн Абдуллоҳга боболари қуйидаги ҳадисни айтиб берган эканлар: “Абу саид ал-Худрий менга: “Назаримда, сен қўйни ва далани яхши кўрадиган кўринасан, агар қўй боқаётган бўлсанг ёки шунчаки далада бўлсангу, намозга азон айтсанг, азонни баланд овоз билан айтгин, чунки паст овоз билан айтсанг, узоқдаги хоҳ жин, хоҳ инсон, хоҳ жонли ва хоҳ жонсиз нарса бўлсин, товушингни эшитмай қолади. Улар қиёматда сенинг азон айтганингга гувоҳлик беради”, - дегандилар. Абу Саид ал-Худрий: “Буни мен Расулуллоҳ (сав)дан эшитгандим”, - дейдилар”.
610 - Ҳадис
6-боб Азон овозини эшитиши билан қон тўкиш тўхтатилади 610-ҳадис Анас ибн Молик қуйидаги ҳадисни айтиб бердилар: “Расулуллоҳ (сав), агар биз билан бир қавм уруш қилаётган бўлса, тонг отгунча урушгани қўймас эдилар. Тонгда азон овозини эшитиб урушни тўхтатар эдилар, азон овозини эшитмасалар, урушни давом эттираверардилар. Бир куни Хайбарга қараб йўлга чиқдик, тунда етиб бордик. Тонг отгач, ҳали азон айтилмаган пайтда, отам Абу Талҳа уловларини миндилар, мен орқаларига мингашиб олдим, оёғим Расулуллоҳ (сав)нинг оёқларига тегиб борар эди. Хайбарликлар сават ва кетмонларини кўтариб, қаршимиздан чиқдилар. Расулуллоҳ (сав)ни кўриб: “Бу Муҳаммаддир, худо ҳаққи Муҳаммаддир! – дейишди. Расулуллоҳ (сав) уларни кўриб:”Аллоҳу Акбар, Аллоҳу Акбар, Хайбар хароб бўлди, биз бирор қавмнинг ерига келиб тушсак, огоҳлантирилганларнинг ҳолига войдир!” – дедилар” (яна қ. 371).
611 - Ҳадис
7-боб Азон овозини эшитган киши нима дейди? 611-ҳадис Абу Саид ал-Худрий ривоят қиладилар: “Расулуллоҳ (сав): “Азон овозини эшитганингизда муаззин айтаётган сўзларни такрорлаб туринглар!” – деганлар”.
612 - Ҳадис
612-ҳадис Исо ибн Талҳа: “Бир куни мен Муовиянинг муаззин айтаётган сўзларни “Ашҳаду анна Муҳаммадан Расулуллоҳ” деган жойигача такроран айтиб турганини кўрдим”, - дейдилар.
613 - Ҳадис
613-ҳадис Яҳё ибн Абу Касир юқоридаги ҳадисга ўхшаш ҳадисни ривоят қила туриб, дедилар: “Баъзи биродарларимиз менга айтдиларки, Муовия, муаззин “Ҳаййа алас-салот” деганда, “Ла ҳавла ва ла қуввата илла биллаҳ” – деб айтибди-да: “Пайғамбаримиз (сав)нинг ҳам шундай деганларини эшитганман”,- дебди”.
614 - Ҳадис
8-боб Азонни эшитиб бўлгач, дуо айтмоқ 614-ҳадис Жобир ибн Абдуллоҳ ривоят қиладилар: “Расулуллоҳ (сав): “Кимки азонни эшитгач, “Илоҳи, ушбу мукаммал даъват ҳамда абадий саловат соҳиби бўлмиш Муҳаммад (ас)нинг мартабасини улуғ қилиб, неъматларингни унга бисёр қилгин, у зотга ўзинг ваъда қилган мақоми маҳмудни (энг шарафли ўринни) ато этгин!” – деса, қиёматда мен уни шафоат қиламан”, - деганлар (яна қ.4719).(Имкон борича бу дуонинг араб тилидагисини ўқишга ҳаракат қилиш тавсия этилади).
615 - Ҳадис
9-боб “Мен азон айтаман” деб талашмоқ Бир куни қавмлар азон айтишни талашиб қолдилар. Шунда Саъд ибн Абу Ваққос чек ташладилар, чекига тушган киши азон айтди. 615-ҳадис Абу Ҳурайра ривоят қиладилар: “Расулуллоҳ (сав): “Одамлар азон айтишнинг ҳамда биринчи сафда туриб намоз ўқишнинг қанчалик савоби борлигини билганларида эди, ҳеч бўлмаганда чек ташлаб, ўз ниятларига эришган бўлар эдилар. Агар одамлар жамоат билан намоз ўқишнинг савобини билганларида, ким ўзарга масжидга югуриб кетган бўлар эдилар. Агар одамлар бомдод билан хуфтон намозини жамоат билан бирга ўқишда қандай савоб борлигини билганларида, эмаклаб бўлса ҳам борган бўлар эдилар”, - деганлар”.
616 - Ҳадис
10-боб Азон айтаётиб бошқа сўзларни айтиб юбориш Сулаймон ибн Сурд азон айтаётиб бошқа сўзларни гапириб юбордилар. Ҳасан Басрий: “Азон ёки такбир айтаётиб кулишнинг зарари йўқ”, - дейдилар. 616-ҳадис Абдуллоҳ ибн Ҳорис ривоят қиладилар: “Ёғингарчилик бўлиб турган кунлардан бирида Ибн Аббос бизга ваъз айтдилар. Муаззин “Ҳаййа алас-салот” деб айтаётганда Ибн Аббос уни тўхтатиб, “Намозни ҳар ким ўз уйида ўқисин!” – деб қичқиришни буюрдилар. Кишилар ажабланиб бир-бирларига қарадилар. Шунда Ибн Аббос: “Ибн Аббосдан яхшироқ киши (яъни Расулуллоҳ) ҳам шундай қилгандилар. Бугун жума, шундай қилса бўлади”, - дедилар” (яна қ. 668, 901).
617 - Ҳадис
11-боб Кўзи ожиз одам, агар унга намоз вақти бўлганлиги хабар қилинса, азон айтиши мумкин 617-ҳадис Солимнинг отаси Абдуллоҳ ибн Умар қуйидаги ҳадисни айтиб бердилар: “Расулуллоҳ (сав): “Билол (бомдод намози учун) жуда эрта азон айтади. Сизлар Ибн Умму Мактум азон айтгунча еб-ичиб ўтираверинглар”, - дедилар. Ибн Умму Мактум кўзи ожиз одам эди. Бирор киши унга: “Тонг отди, тонг отди” деб айтмагунча, азон айтмас эди” (яна қ. 1918, 2656, 7248). (Кўзи ожиз кишининг азон айтиши ҳанафий мазҳабига кўра макруҳ ҳисобланади (“Фатҳ, Муҳит”) ).
618 - Ҳадис
12-боб Тонг отгандан кейин азон айтмоқ 618-ҳадис Абдуллоҳ ибн Умар нақл қиладилар: “Уммул-мўминин (мўминлар онаси) Ҳафса (Расулуллоҳ (сав) нинг хотинлари): “Расулуллоҳ (сав) муаззин бомдодга азон айтишдан кечикиб қолса-ю, тонг отиб қолса, (масжидда) намоз бошланишидан аввал енгилгина икки ракъат намоз ўқиб олар эдилар”, - деб айтганлар” (яна қ. 1173, 1181).
619 - Ҳадис
619-ҳадис Ойша (рз.) нақл қиладилар: “Расулуллоҳ (сав): бомдод намози учун айтиладиган азон билан такбир ўртасида енгилгина икки ракъат намоз ўқиб олардилар” (Бу ҳадис мансух. Зеро “Ҳидоя”да айтилишига, Пайғамбаримиз (сав)дан бомдоднинг фарзидан олдин икки ракъат суннатдан бошқа намоз ўқимас эдилар, деган ривоят бор).
620 - Ҳадис
620-ҳадис Абдуллоҳ ибн Умар қуйидаги ҳадисни айтиб бердилар: “Расулуллоҳ (сав): “Билол кечаси (жуда эрта) азон айтади, сизлар Ибн Умму Мактум азон айтгунча еб-ичаверинглар”, - деганлар”.
621 - Ҳадис
13-боб Бомдоддан аввал азон айтмоқ 621-ҳадис Абдуллоҳ ибн Масъуд бундай дейдилар: “Расулуллоҳ (сав): “Билол азон айтганда бирортангиз саҳарлик қилишдан тўхтатманг, чунки муаззин ухлаб ётганларни уйғотиш учун, уйғоқларни намозга чорлаш учун қоронғуда азон айтади”, - дедилар. Кейин, Расулуллоҳ (сав) бармоқларини осмонга кўтариб пастга туширдилар-да, “Бу ҳали тонг отганини англатмайди, мана бундай бўлса, тонг отган бўлади”, - деб бармоқларини энди уфқ бўйлаб юргиздилар” (яъни, қуёш нурлари аввал тиккасига таралса, бу тонг отди, дегани эмас, нур кўндалангига таралса тонг отган ҳисобланади).
622 - Ҳадис
622-623-ҳадислар Ибн Умар (рз.): “Ойша онамиз бундай дегандилар”, - дейдилар: “Расулуллоҳ (сав): “Билол кечаси азон айтади. Сизлар Ибн Умму Мактум азон айтгунча, еб-ичаверинглар, - деганлар”.
623 - Ҳадис
622-623-ҳадислар Ибн Умар (рз.): “Ойша онамиз бундай дегандилар”, - дейдилар: “Расулуллоҳ (сав): “Билол кечаси азон айтади. Сизлар Ибн Умму Мактум азон айтгунча, еб-ичаверинглар, - деганлар”.
624 - Ҳадис
14-боб Азон билан такбир орасида қанча вақт бор? Намоз ўқишнинг бошланишини кутиб ўтирган киши 624-ҳадис Абдуллоҳ ибн Муғаффал ал-Музаний ривоятлари: “Расулуллоҳ (сав): “Ҳар бир азон билан такбир ўртасидаги вақтда истаган киши бир карра намоз ўқиб олса бўлади”, - деб уч бор қайтариб айтдилар” (яна қ. 627).
625 - Ҳадис
625-ҳадис Анас ибн Молик қуйидагини айтиб бердилар: “Муаззин азон айтса, Расулуллоҳ (сав)нинг саҳобалари ўринларидан туриб, ўзлари намоз ўқийдиган устунлар қаршисига шошилар эди, ҳатто Расулуллоҳ (сав) уйларидан чиққанларида улар азон билан такбир оралиғида ўқийдиган намозни ўқиётган бўлишарди. Шом намозидан аввал улар ҳам икки ракъат намоз ўқиб олишарди. Азон билан такбир ўртасида вақт унчалик кўп бўлмас эди”. Имом Бухорий: “Шом намозининг азони билан такбири орасида ҳеч нарса йўқ эди”, - дейдилар. Имом Нававий: “Шомнинг азони билан такбири ўртасида икки ракъат намоз ўқиш мустаҳабдир”, - дейдилар. Имом Молик: “Шомда азон билан такбир орасида намоз ўқиш жоиздир”, - дейдилар. Ҳанафийлар эса: “Шомнинг азони билан такбири ўртасида уч қадам юргудек фурсат бордир”, - дейишади.
626 - Ҳадис
15-боб Такбир айтилишини кутиб турган киши 626-ҳадис Ойша онамиз бундай деганлар: “Расулуллоҳ (сав) муаззин бомдод намозига азон айтиб бўлгач, ўринларидан туриб, тонг отгунича енгилгина икки ракъат намоз ўқиб олар эдилар, сўнг муаззин такбир айтгунича ўнг томонларини босиб ёнбошлар эдилар” (яна қ. 994, 1123, 1170,6310).
627 - Ҳадис
16-боб Хоҳлаган киши ҳар бир азон билан такбир ўртасида намоз ўқиб олиши мумкин 627-ҳадис Абдуллоҳ ибн Муғаффал бундай деганлар: “Расулуллоҳ (сав): “Ҳар бир азон билан такбир ўртасида намоз бордир, учинчиси хоҳлаган кишига”, - дедилар”.
628 - Ҳадис
17-боб “Биттангиз азон айтинг”, деган киши хусусида 628-ҳадис Молик ибн ал-Ҳувайрис ривоят қиладилар: “Қавмимга тегишли бир неча киши билан Расулуллоҳ (сав)нинг уйларига келдик. Биз Расулуллоҳ (сав) ҳузурларида 20 кун турдик. Расулуллоҳ (сав) жуда ҳам раҳмдил ва меҳрибон эканлар. Аҳлимизни соғинганимизни кўргач, “Аҳлингизга қайтинглар, улар билан бирга бўлинглар, уларга ўргатинглар, намоз ўқинглар, намоз вақти бўлса, бир киши азон айтсин, ичингизда каттароғингиз эса имомлик қилсин”, - дедилар”.
629 - Ҳадис
18-боб Мусофирлар учун азон ва такбир айтмоқ, шунингдек Муздалифада азон ва такбир айтмоқ; муаззиннинг совуқ кечада ёки ёмғирли кечада “намозни жой-жойларингизда ўқинглар”, деб азон айтиши 629-ҳадис Абу Зарр ривоят қиладилар: “Расулуллоҳ (сав) билан бирга эдик. Муаззин азон айтмоқчи бўлганда, Расулуллоҳ унга: “Салқинлатгин (шошмай тургин)”, - дедилар. Кейин яна у азон айтмоқчи бўлди, Расулуллоҳ яна: “Салқинлатгин”, - дедилар. Кейин яна азон азон айтмоқчи бўлганида, Расулуллоҳ яна: “Салқинлатгин”, - дедилар, ҳатто тепаликлар сояси ўзи баробарига келди. Шунда Расулуллоҳ (сав): “Куннинг ҳарорати жаҳаннам нафасидандир”, - дедилар”.
630 - Ҳадис
630-ҳадис Молик ибн ал-Ҳувайрис нақл қиладилар: “Расулуллоҳ (сав) ҳузурларига сафарга кетаётган икки киши кириб келди. Расулуллоҳ уларга: “Сафарга чиққанларингизда аввал азон айтинглар, сўнг такбир айтинглар, кейин каттангиз имоматга ўтсин”, - дедилар”.
631 - Ҳадис
631-ҳадис Молик ибн ал-Ҳувайрис нақл қиладилар: “Жаноб Расулуллоҳ (сав)нинг уйларига ёш йигитлик вақтимизда бориб, 20 кун турдик. Расулуллоҳ (сав) раҳмдил ва меҳрибон эдилар. Жаноб Расулуллоҳ аҳлимизни соғинганимизни билиб, уйимизга кимларни ташлаб келганлигимизни сўрадилар. Биз айтдик. Шунда Расулуллоҳ: “Аҳлингиз олдига қайтинглар. Улар билан бирга бўлинглар, уларга шарият ҳукмларини ўргатинглар. Мен сизларга буюрганларимни уларга ҳам буюринглар”, - деб анча насиҳат қилдилар (уларнинг баъзиси ёдимдан чиққан), кейин, “Мен қандай намоз ўқиган бўлсам, шундай намоз ўқинглар. Намоз вақти бўлса, биттангиз азон айтинг, каттангиз имоматга ўтсин”, - дедилар”.
632 - Ҳадис
632-ҳадис Нофеъ ривоят қиладилар: “Ибн Умар совуқ кечалардан бирида Дажнонда (тепалик номи) азон айтдилар, кейин бизга: “Жой-жойларингизга бориб намоз ўқинглар, Расулуллоҳ (сав) азон айтгандан кейин муаззинга: “Сафардалик кезингизда совуқ кеча ёки лойгарчилик бўлса, жой-жойларингизда намоз ўқинглар” – деб айтмоқни буюрардилар”, - дедилар” (яна қ. 666).
633 - Ҳадис
633-ҳадис Авн ибн Абу Жуҳайфа оталаридан эшитганларини ривоят қиладилар: “Расулуллоҳ (сав)ни Абтаҳда (жойнинг номи) кўрдим. Билол келиб азон айтдилар. Кейин, учи найза ҳассаларини олиб чиқиб, Расулуллоҳ (сав)нинг рўпараларига санчиб қўйдилар, сўнг такбир айтдилар” (яна қ. 187).
634 - Ҳадис
19-боб Муаззин азон айтаётганда бошини ё гавдасини у ёқ, бу ёққа ўгирадими “Билол азон айтаётганда икки бармоғини икки қулоғига тиқди, Ибн Умар эса икки бармоғини тиқмас эди”, - деб зикр қилинади. Иброҳим: “Таҳоратсиз азон айтмоқни зарари йўқдир”, - дейдилар. Ато: “Азон ҳақдир ва суннатдир”, - деганлар. Ойша онамиз: “Расулуллоҳ (сав) ҳамма вақт ҳам Аллоҳни зикрини қилаверар эдилар”, - дейдилар. (Яъни азон айтиш учун таҳорат шарт эмас, демоқчилар. Ҳанафий мазҳабига шу ривоят асос бўла олади. Унга кўра, азонни таҳорат билан айтиш яхши. Лекин таҳоратсиз ҳам жоиз саналади. Такбирни таҳоратсиз айтиш макруҳ). 634-ҳадис Авн ибн Абу Жуҳайфа ривоят қиладилар: “Менинг отам бир куни Билолнинг азон айтаётиб бошини у ёқдан бу ёққа бураётганини кўрган эканлар”.
635 - Ҳадис
20-боб Киши: “Намоз вақти ўтиб кетибди”, - деса бўладими? Ибн сирин: “Намоз вақти ўтиб кетибди”, - демоқни макруҳ санаб, “Бунинг ўрнига, намозга етолмай қолибмиз, десин”, - дейдилар. Имом Бухорий эса, Ибн Сириннинг сўзини рад қилиб, “Расулуллоҳ (сав)нинг сўзлари (“Намоз ўтиб кетибди”) тўғри”, - дейдилар. 635-ҳадис Абдуллоҳ ибн Абу Қатоданинг оталари бундай деган эканлар: “Бир вақт биз Расулуллоҳ (сав) билан намоз ўқиётган эдик, бирдан одамларнинг шовқун-сурони эшитилди. Жаноб Расулуллоҳ (сав) намозни ўқиб бўлганларидан сўнг: “Сизларга нима бўлди?” – дедилар. ”Намозга шошилдик”, - дейишди. Расулуллоҳ: “Намозга келганда ундай қилманглар, тинчликка риоя қилинглар. Намознинг қаерига етиб келсангиз, ўша жойидан қўшилиб ўқийверинглар, қанчаси ўтиб кетган бўлса, кейин ўзингиз тўлдириб ўқиб олинглар!” – дедилар”.
636 - Ҳадис
21-боб Киши намозга ҳовлиқмай, виқор билан келсин! Жаноб Расулуллоҳ (сав): “Намозга қачон етиб келсангиз, келган жойидан давом эттираверинглар, қолганини кейин тўлдириб ўқиб оласиз!” – деганлар”, - дейдилар Абу Қатода (рз.). 636-ҳадис Абу Ҳурайра нақл қиладилар: “Расулуллоҳ (сав): “Агар такбир айтилганини эшитсангиз, ҳовлиқмай, виқор билан намозга келингиз. Намозга қачон етиб келсангиз, келган жойидан жамоатга қўшилиб ўқийверинглар, қолганини тўлдириб ўқиб оласизлар”, - деганлар”.
637 - Ҳадис
22-боб Киши имомни такбир айтаётганини кўрса, қачон сафга туради 637-ҳадис Абуллоҳ ибн Абу Қатоданинг оталари ривоят қиладилар: “Расулуллоҳ (сав): “Такбир айтилаётган пайтда, то мени кўрмагунингизча, сафга турманглар!” – деганлар”.
638 - Ҳадис
23-боб Киши намозхонлар сафига шошилиб келиб турмасин, тинчлик ва оҳисталик билан турсин! 638-ҳадис Абуллоҳ ибн Абу Қатоданинг оталари ривоят қиладилар: “Расулуллоҳ (сав): “Такбир айтилаётганда то мени кўрмагунингизча сафга турманглар, тинчликка риоя қилинглар!” – деганлар”.
639 - Ҳадис
24-боб Такбир айтилгандан сўнг киши бирор сабаб билан масжиддан чиқса бўладими? 639-ҳадис Абу Ҳурайра нақл қиладилар: ““Расулуллоҳ (сав) ҳужраларидан чиқдилар. Намозга такбир айтилди, сафлар тикланди, Жаноб “Расулуллоҳ меҳроб қаршисига келиб турдилар. Намозга такбири таҳрима айтилишини кутиб турган эдик, “Ўринларингиздан қимирламанглар!” – деб ҳужраларига кириб кетдилар, шу ҳолатимизда туриб қолдик. Бир оздан сўнг сочлари ҳўл, бошларидан сув томиб турган ҳолда қайтиб чиқдилар, ғусл қилибдилар” (Яъни, одамлар кутиб қолмасин деб сочиқ билан артинишни ҳам тарк этиб чиққанлар).
640 - Ҳадис
25-боб Агар имом: “Ўринларингиздан қимирламанглар!” – деб чиқиб кетса, қайтиб келгунича кутиб турилади 640-ҳадис Абу Ҳурайра ривоят қиладилар: “Намозга такбир айтилди одамлар сафларини тўғрилашди. Жаноб “Расулуллоҳ (сав) ҳужраларидан чиқиб, олдинга ўтдилар. У киши жимоъдан кейинги ҳолатда эканлар. “Ўрнингиздан қимирламанглар!” – деб қайтиб кириб кетдилар. Сўнг ғусл қилиб чиқдилар, сочларидан сув томиб турарди. Кейин одамлар билан намоз ўқидилар”.
641 - Ҳадис
26-боб Кишининг “Ҳали намоз ўқимадик”, - дейиши ҳақида 641-ҳадис Жобир ибн Абдуллоҳ ривоят қиладилар: “Хандақ воқеаси куни Ҳазрат Умар “Расулуллоҳ (сав) ҳузурларига келиб: “Ё “Расулуллоҳ, Аллоҳ ҳаққи-ҳурмати, кун ботиб кетди ҳамки, намози аср ўқиёлмай қолдим”, - дедилар. Бу гапни айтганларида ифтор қилиб бўлинганди. Шунда “Расулуллоҳ (сав): “Аллоҳга қасамки, мен ҳам ҳали аср намозини ўқимадим”, - дедилар. Кейин, “Расулуллоҳ (сав) Бутҳон деган жойга бордилар, мен ҳам у киши билан бирга бордим, таҳорат олдилар, сўнг (кун ботгандан кейин) намози асрни ўқидилар, ундан кейин шомни ўқидилар” (яна қ. 596).
642 - Ҳадис
27-боб Такбир айтилгандан кейин имом зарур иш билан банд бўлиши мумкинми? 642-ҳадис Анас (рз.) нақл қиладилар: “Намозга такбир айтилди ҳамки, “Расулуллоҳ (сав) масжиднинг ёнида бир киши билан гаплашиб туравердилар, ҳатто (айрим) намозхонлар ухлаб қолдилар”.
643 - Ҳадис
28-боб Намозга такбир айтилгандан сўнг (биров билан) сўзлашмоқ 643-ҳадис Ҳумайд (рз.) ривоят қиладилар: “Собит ал-Бунонийдан намозга такбир айтилгандан кейин (биров билан) гаплашган киши тўғрисида сўрадим. Шунда у: “Намозга такбир айтилгандан кейин бир киши келиб “Расулуллоҳ (сав)ни гапга тутиб қолганди, деб Анас менга айтганди”, - деди”.
644 - Ҳадис
29-боб Жамоат билан намоз ўқишнинг вожиблиги Ҳасан Басрийнинг оналари меҳрибончилик қилиб, хуфтон намозини жамоат билан ўқиш учун масжидга боришдан қайтардилар, шунда у кишига итоат қилмадилар. 644-ҳадис Абу Ҳурайра нақл қиладилар: ““Расулуллоҳ (сав): “Аллоҳ таоло ҳаққи-ҳурмати, одамларга “Ўтин йиғинглар!” деб буюрсаму ўтин йиғсалар, кейин, “Намоз ўқинглар десаму бир киши азон айтса, иккинчиси имомлик қилса, мен эса, намозга келмаган кишиларнинг уйларига бориб, устиларидан ўт ёқиб юборгим келади. Аллоҳга қасамки, жамоат билан намоз ўқишга келмаган ўша кишиларнинг ҳар бири бу ерга (масжидга) келганда пиширилган ёғли гўшт ёки калла-почча ейишни билса эди, албатта хуфтонга келар эди”, - дедилар” (яна қ. 657, 2420, 7224).
645 - Ҳадис
30-ҳадис Жамоат билан намоз ўқишнинг фазилати Асвад ибн Язид ўз жамоатлари билан намоз ўқишга улгурмай қолсалар, бошқа масжидга келдилар, сўнг азон ва такбир айтиб, (бошқа) жамоат билан намоз ўқидилар. 645-ҳадис Абдуллоҳ ибн Умар ривоят қиладилар: “Расулуллоҳ (сав): “Жамоат билан ўқилган намоз савоби ёлғиз ўқилган намоз савобидан 27 марта ортиқдир”, - дедилар”.
646 - Ҳадис
646-ҳадис Абу Саид ал-Худрий “Расулуллоҳ (сав)нинг “Жамоат билан ўқилган намоз савоби ёлғиз ўқилган намоз савобидан 25 марта ортиқдир”, - деганларини эшитган эканлар.
647 - Ҳадис
647-ҳадис Абу Ҳурайра (рз.): ““Расулуллоҳ (сав) бундай деганлар: “Кишининг жамоат билан ўқиган намозининг савоби уйида ўқиган намозининг савобидан 25 баробар ортиқдир. Бунга киши яхшилаб таҳорат олиб, уйидан масжидга фақат намоз ўқийман, деган ниятда чиқсагина эришиш мумкин. Шу ниятда босган ҳар бир қадамини кўтариб улгурмасидан Аллоҳ таоло унинг мартабасини бир даража кўтаради ва битта гуноҳидан кечади. Намоз ўқиётганида эса малоикалар унинг тепасида: “Илоҳи, бу бандангни ярлақагин, бу бандангга раҳм қилгин!” – деб илтижо қилиб туришади. Қайси бирингиз намоз ўқийман, деб кутиб турган бўлсангиз, намоз ўқиётган ҳисобида бўласиз” (яна қ. 176).
648 - Ҳадис
31-боб Намози бомдодни жамоат билан ўқишнинг фазилати 648-ҳадис Абу Ҳурайра (рз.): “Расулуллоҳ (сав)дан қуйидаги ҳадисни эшитганман”, - дейдилар: “Ҳар бирингиз жамоат билан ўқиган намозингизнинг савоби ёлғиз ўқиган намозингиз савобидан 25 марта ортиқдир. Тунги фаришталар билан кундузи фаришталарнинг барчаси намози бомдодга келиб жамулжам бўлишади”. Абу Ҳурайра (рз.): “Агар хоҳласангиз, “Инна қуръонал фажри кона машҳудан” “Зеро, тонгги ўқиш (фаришталар) ҳозир бўладиган (намоз)дир” (“Исро” сураси, 78-оят) – деган ояти каримани ўқинглар”, - дейдилар (яна қ. 176).
649 - Ҳадис
649-ҳадис Абдуллоҳ ибн Умар: “Жамоат намози 27 марта ортиқдир”, - деганлар.
650 - Ҳадис
650-ҳадис Умму Дардо ривоят қиладилар: “Абу Дардо олдимга ғазабланиб кириб келдилар. “Нега ғазабланаяпсиз?” – дедим. “Аллоҳга қасамки, Муҳаммад умматининг жамоат билан намоз ўқишидан бошқа бирор савобли иши қолмади”, - дедилар”. ***** "Ўзбек халқ табобати" мобил иловасини бепул юклаб олинг! https://play.google.com/store/apps/details?id=com.aasnsprojects.uzbnatmed
«
←
9
10
11
12
13
14
15
16
17
→
»